Ғылымнан өндіріске: Қазақстан мен Қытай бірлескен Сутегі технологиялары орталығын іске қосты
Астана, 9 сәуір – Бүгін әл-Фараби атындағы ҚазҰУ базасында қазақстан-қытай Сутегі технологиялары орталығының ресми ашылу салтанаты өтті. Маңызды іс-шараға ҚР Энергетика министрі Ерлан Ақкенженов, Шанхай қаласының мэрі Гун Чжэн, ҚР Ғылым және жоғары білім министрі Саясат Нұрбек, сондай-ақ университет ректоры Жансейіт Түймебаев қатысты.
Орталықтың құрылуы елде іргелі ғылым, білім беру және нақты өнеркәсіпті біріктіретін заманауи технологиялық экожүйені қалыптастыруға бағытталған тікелей қадам болып табылады. Кездесу барысында Энергетика министрі Ерлан Ақкенженов жетекші шетелдік серіктестермен ықпалдасу саланың даму қарқынын айтарлықтай жеделдетуге мүмкіндік беретінін атап өтті.
«Сутегі энергетикасы біздің сектордың дамуының стратегиялық бағыттарының бірі болып табылады. 2024 жылы қабылданған Тұжырымдама экономиканы декарбонизациялауға бағытталған жаңа саланы қалыптастыру үшін құқықтық және экономикалық негіз қалады. Жаңа орталық жаңа формациядағы инженерлерді даярдаудың, қолданбалы зерттеулер жүргізудің және инновацияларды өндіріске тезірек енгізудің басты бейінді алаңына айналуы тиіс», – деді Ерлан Ақкенженов.
Орталықтың жұмысының тәжірибелік негізі болып әл-Фараби атындағы Қазақ ұлттық университеті, Shanghai Jiao Tong University және Energy China International корпорациясы арасында үшжақты меморандумға қол қою саналады. Құжат ауқымды ғылыми-техникалық өзара іс-қимылды дамытуға және озық шешімдерді трансферттеуге бағытталған.
Келісім аясында тараптар бірлескен зерттеулер жүргізуге, сутегі технологияларын сынауға және эксперименттік пилоттық жобаларды іске қосуға келісті. Ғылыми жаңалықтарды коммерцияландыруға және оларды Қазақстан аумағындағы өнеркәсіптік жобаларға интеграциялауға ерекше көңіл бөлінген. Сондай-ақ мамандардың белсенді академиялық алмасуы да көзделген.
Сутегі энергетикасын дамыту жаһандық энергетикалық ауысудың негізгі элементтерінің бірі болып табылады. Қазақстанда бай ресурстық база мен жаңартылатын энергия көздері секторының серпінді өсуіне байланысты осы бағытта елеулі әлеует бар. Қытайлық технологиялық көшбасшылармен серіктестік республиканың жаңа энергетикалық нарықтардағы позициясын нығайтып, индустриялық инновацияларды енгізуді жеделдетеді.
Дереккөз: ҚР Энергетика министрлігінің баспасөз қызметі
https://www.gov.kz/memleket/entities/energo/press/news/details/1197679?lang=kz
